OLLADAS Á ENDOMETRIOSE
Fotografías de Lois Cid
O proxecto "TecEndo, artistas con endometriose" está impulsado dende Galicia e Cataluña por Neves Seara (artista e xestora cultural), Verónica Ramilo (sexóloga e fotógrafa) e Ainara Díaz Cots (mediadora artística).
Como afectadas de endometriose e artistas, decidimos crear o colectivo TecEndo para visibilizar a enfermidade a través de pezas artísticas realizadas en primeira persoa e así empregar a arte como ferramenta de transformación persoal e social.
Froito desta unión e grazas ao apoio da asociación QuerENDO, mulleres con endometriose, nace a exposición "Olladas á Endometriose" na galeraía Solaina de Lugo, cunha selección das nosas obras fotográficas arredor da endometriose e a nosa propia experiencia con ela.
Poñemos así voz á nosa dor, ás nosas inquedanzas e situacións, dende a expresión creativa. Mostrámonos pois unidas e tecEndo redes para evidenciar as consecuencias emocionais, físicas e sociais da endometriose, e visibilizar así a tantas e tantas persoas que viven na mesma situación.
Esta mostra pretende tamén apelar á comprensión das persoas non afectadas, para que coñezan a enfermidade, coa vontade de conseguir máis visibilidade, atención, empatía e investigación médica, xa que, a pesar de ser a endometriose unha enfermidade que afecta ao 10% das mulleres e persoas que menstrúan, é unha das doenzas menos investigadas, debido ao nesgo de xénero"
Mostra realizada entre o 16 de Marzo e o 30 de Abril de 2024